បន្ទាយមានជ័យ៖ រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា លោក វង សូត បានប្រកាសដាក់ឱ្យប្រើប្រាស់នូវបណ្ណាល័យថ្មីមួយស្ថិតក្នុងបរិវេណវិទ្យាល័យភ្នំស្រុក ស្រុកភ្នំស្រុក ខេត្តបន្ទាយមានជ័យ។

បណ្ណាល័យនេះមានឈ្មោះថាបណ្ណាល័យយ៉វ ឆុំ ដែលជាអំណោយរបស់លោក កែវ ពិសិដ្ឋ និងភរិយាភ្នំស្រុក ដើម្បីតម្កល់ប្រយោជន៍ និងចែករំលែកទម្លាប់ការអានដល់សិស្សានុសិស្សអភិវឌ្ឍន៍សមត្ថភាពរបស់ខ្លួន។

នៅក្នុងពិធីសំណេះសំណាលជាមួយប្រជាពលរដ្ឋ មន្រ្តីរាជការ លោកគ្រូ អ្នកគ្រូ និងសិស្សានុសិស្សប្រមាណ ៤៣០នាក់នៅថ្ងៃទី១៣ ខែធ្នូ ឆ្នាំ២០២១នេះ លោករដ្ឋមន្ត្រី វង សូត បានលើកឡើងបណ្ណាល័យនៅបរិវេណវិទ្យាល័យភ្នំស្រុកនេះនឹងជួយជាប្រយោជន៍ដល់ការអប់រំក្នុងស្រុក ក៏ដូចជាបង្កើនទម្លាប់នៃការអានដល់សិស្សានុសិស្សឱ្យអភិវឌ្ឍន៍សមត្ថភាពឆ្លើយតបនឹងការជឿនលឿនសព្វថ្ងៃផងដែរ។

បណ្ណាល័យ យ៉ូវ ឆុំ បានបំពាក់សៀវភៅរាប់រយក្បាល ច្រើនចំណងជើង ច្រើនវិស័យផ្នែក បម្រើដល់ការអាន និងសិក្សាស្រាវជ្រាវរបស់សិស្សានុសិស្ស ក៏ដូចជាមហាជនទូទៅ។ បណ្ណាល័យ យ៉ូវ ឆុំ ត្រូវបានចាត់ទុកជាបណ្ណាល័យធំមួយ ក្នុងចំណោមបណ្ណាល័យនៃសាលារៀនដែលមានជាង ៨០០ នៅ ក្នុងខេត្តបន្ទាយមានជ័យ៕